 10.2a པ་ཅན་དུ་བསོད་སྙོམས་ཀྱི་ཕྱིར་ཞུགས་པ་དང ། ཡངས་པ་ཅན་གྱི་བར་དང ། ཁང་པ་བརྩེགས་པའི་བར་གྱི་བར་སྐབས་དེ་ན་ཡངས་པ་ཅན་གྱི་ལིད་ཚ་བི་རྣམས་ཀྱི་བསྐྱེད་མོས་ཚལ་མེ་ཏོག་དང ། འབྲས་བུ་དང ། ཆུ་ཕུན་སུམ་ཚོགས་པ། བྱ་སྣ་ཚོགས་སྐད་འབྱིན་པ་དགའ་བའི་ཚལ་དང་འདྲ་བ་དེ་དག་ན་དེ་དག་གི་རྩེ་བ་དང ། གར་དང ། གླུ་དང ། རོལ་མོའི་སྒྲའི་ཆ་བྱད་སྣ་ཚོགས་དག་དང ། ཁྲུས་ཀྱི་ཡོ་བྱད་སྣ་ཚོགས་དག་ཀྱང་བཞག་པ་དང ། དྲུག་སྡེ་རྣམས་ཀྱིས་སྨྲས་པ། དགའ་བོ་ཉེ་དགའ་བོ། ཡངས་པ་ཅན་གྱི་ལིད་ཚ་བི་འདི་དག་དང ། བསྐྱེད་མོས་ཚལ་གྱི་དགའ་བ་ནི་བཅོམ་ལྡན་འདས་ཀྱིས་སུམ་བཅུ་རྩ་གསུམ་པའི་ལྷ་རྣམས་ཀྱི་དཔེར་མཛད་ན། རེ་ཤིག་དེ་དག་གི་བསྐྱེད་མོས་ཚལ་ཅི་འདྲ་བ་བལྟའོ་ཞེས་དེ་རྣམས་གློད་ནས་དེ་དག་གི་བསྐྱེད་མོས་ཚལ་དུ་ཞུགས་སོ། །དེ་དག་གིས་དེ་ན་བརྩལ་བའི་ཡོ་བྱད་མདའ་བོ་ཆེ་དང་དྲང་བ་དང ། འཕང་རྡོ་སྣ་ཚོགས་དང ། གར་དང་གླུ་དང ། རོལ་མོའི་སྒྲའི་ཆ་བྱད་སྣ་ཚོགས་དང ། པི་བང་དང ། གླིང་བུ་དང ། རྫ་རྔ་དང ། ཁར་རྔ་དང ། སྐད་སྙན་ལ་སོགས་པ་སྣ་ཚོགས་དང ། ཁྲུས་ཀྱི་ཡོ་བྱད་སོ་ཕག་དང ། བཀྲུ་བའི་ཕྱེ་མ་དང ། མགོ་བཀྲུ་བ་སྐྱུ་རུ་ར་སྣ་ཚོགས་མཐོང་བ་དང ། དེ་རྣམས་ཀྱིས་ཕན་ཚུན་སྨྲས་པ། དགའ་བོ་ཉེ་དགའ་བོ་ཡོ་བྱད་ཕུན་སུམ་ཚོགས་པ་རྣམ་པ་དུ་མ་འདི་དག་ཡོད་ན། ཅི་རེ་ཤིག་བརྩལ་བྱ་འམ། འོན་ཏེ་གར་བྱ་འམ། གླུ་བླང་ངམ། རོལ་མོའི་སྒྲ་བྱ་འམ། ཁྲུས་བྱ། ཁ་ཅིག་གིས་སྨྲས་པ་བདག་ཅག་བཀྲུས་ནས་རིང་ཞིག་ལོན་གྱིས། ཇེ་ཁྲུས་བྱའོ་ཞེས་དེ་དག་གློད་ནས་སོ་ཕག་དག་གིས་དྲུད་ཅིང་དྲུད་ནས་ཁྲུས་བྱ་བར་བརྩམས་པ་དང ། བཟོའི་གནས་དང ། ལས་ཀྱི་གནས་དེ་དག་ལ་མཁས་པས་ཁྲུས་ལ་ཞུགས་པ་དེ་རྣམས་ཀྱི་སྒྲ་ཡིད་དུ་འོང་བ་འདི་ལྟ་སྟེ། སིལ་སྙན་ཡན་ལག་ལྔ་པ་སྐྱེས་བུ་མཁས་པས་ལེགས་པར་དཀྲོལ་བའི་ལྟ་བུ་བྱུང་ངོ ། །སྐྱེ་བོའི་ཚོགས་ཕལ་པོ་ཆེ་ལམ་དེ་ནས་འགྲོ་བས་སྒྲ་དེ་ཐོས་པ་དང ། དེ་རྣམས་རྣ་བྱོ་སྟེ། ཡུད་ཙམ་བསྡད་ནས་སྨྲས་པ། ཤེས་ལྡན་དག་ཡངས་པ་ཅན་གྱི་ལིད་ཚ་བི་རྣམས་ཀྱི་བསྐྱེད་མོས་ཚལ་ན་གར་མཁན་རྣམས་གར་བྱེད་པ |
